Sa ating pagtanda, nagbabago ang direksyon ng buhay -- mapa-karera, relasyon, o pagkakaroon ng sariling pamilya. Kadalasan, nagiging hamon ang pagpapanatili ng matibay na koneksyon kay nanay. Pero dapat nating tandaan na malayo man ang ating marating o malaki man ang pagbabago sa buhay, mas dapat maging malalim ang ugnayan sa kanila:

1. Tanggapin ang Bagong Hugis ng Relasyon Bilang Anak at Ina. Bawat relasyon ay may pagbabago. Siya man ang nakagawian mong sandalan noon, si nanay ay maaaring lumapit sa’yo ngayon kapag siya ang may problema. Ito ay ilan lamang sa mga dapat makasanayang bahagi ng bagong kabanata ng iyong buhay. Kaya mahalaga na patatagin ang inyong samahan, dahil sa bawat tagumpay o pagsubok, mas makikita niyo ang kahalagahan ng isa’t isa.


2. Sikaping magparamdam lagi, gaano man kalayo. Hindi kailangang maputol ang koneksyon sa ating mga nanay dahil lamang sa paninirahan sa ibang lugar o iba pang responsibilidad sa buhay. Ipadama pa rin kay mama na nariyan ka. Subukin ang pagbisita ng mas madalas. Sa tuwing nakakakita ng larawan na nagpapaalala sa’yo sa kaniya, maari mo itong i-chat or magpadala ng voice message. Bawat atensyon mula sa’yo ay munting paalala ng kaniyang halaga sa iyong buhay.


3. Ipahayag ang mga hindi madalas sabihin. Palaging ipaalam sa ating mga minamahal sa buhay kung gaano sila kahalaga sa atin. Ipaalam kay nanay ang mga tagumpay, hamon at maging maliliit na bagay sa inyong buhay upang patuloy silang maging bahagi nito.

Hindi kailangang maging hadlang ang oras o distansya para makapagpatibay ng koneksyon sa mga mahal natin sa buhay, lalo na sa ating mga ina. Bawat pagbibigay ng atensyon ay tunay na nakakapagdulot ng kasiyahan sa kanila, at nagpapakita ng ating lubos na pasasalamat at pagmamahal.